Кўп қаватли уйларнинг биринчи қаватида бизнес юритиш тартиби соддалаштирилиши мумкин
Ўзбекистонда кўп қаватли уйларнинг биринчи қаватида жойлашган квартираларда айрим савдо ва хизмат кўрсатиш фаолиятини амалга ошириш учун уларни нотурар жой тоифасига ўтказиш талабини бекор қилиш таклиф этилди. Бунинг ўрнига хабардор қилиш тартибини жорий этиш режалаштирилмоқда.
Президент раислигида аҳоли бандлигини таъминлаш ва даромадларини ошириш масалалари бўйича ўтказилган йиғилишда кўп қаватли уйларнинг биринчи қаватларидан тадбиркорлик мақсадларида фойдаланиш тартибини енгиллаштириш масаласи муҳокама қилинди.
Ҳозирда квартирадан савдо ёки хизмат кўрсатиш объекти сифатида фойдаланиш учун уни нотурар жой тоифасига ўтказиш талаб этилади. Йиғилишда ушбу жараён ортиқча келишув ва рухсат бериш тартибларини талаб қилаётгани қайд этилди.
Таклифга кўра, биринчи қаватдаги квартираларда айрим турдаги бизнес фаолиятини нотурар жойга ўтказмасдан, хабардор қилиш асосида амалга ошириш мумкин бўлади.
Бундай биноларда сартарошхона, гўзаллик салони, кичик дўкон, ателье, пойабзал ва маиший техника таъмирлаш устахонаси каби аҳолига яқин хизмат турларини ташкил этиш мумкинлиги кўрсатиб ўтилди.
Шу билан бирга, ҳар қандай фаолиятга автоматик равишда рухсат берилиши назарда тутилмаган.
Масъулларга бир ой муддатда биринчи қаватдаги квартираларда рухсат этиладиган хизмат турлари рўйхатини ҳамда бундай объектларга қўйиладиган хавфсизлик талабларини ишлаб чиқиш топширилди.
Шунингдек, ҳудудларда тўлиқ фойдаланилмаётган ва бўш турган бино ҳамда ер участкаларини аниқлаб, уларни янги ишлаб чиқариш ва хизмат кўрсатиш лойиҳалари билан боғлаш вазифаси белгиланди. Туман ва маҳаллалардаги серқатнов кўчаларда тадбиркорлик объектларини мастер-режалар асосида жойлаштириш кўзда тутилмоқда.
Ҳозирча ушбу янги тартиб кучга кирмаган. Унинг аниқ қоидалари, рухсат этиладиган фаолият турлари ва хавфсизлик талаблари тегишли ҳужжатлар қабул қилинганидан кейин маълум бўлади.
