Фуқаролар ер участкаларига қуйидагилар асосида эга бўлиши мумкин:
  • мерос қилиб қолдириладиган умрбод эгалик қилиш;
  • доимий фойдаланиш;
  • шошилинч (вақтинча) фойдаланиш;
  • ижарага олиш;
  • мулк ҳуқуқи.

Якка тартибда уй-жой қуриш учун ер участкалари бериш ва ер участкаларига мерос қилиб қолдириладиган умрбод эгалик қилиш ҳуқуқини реализация қилиш "E-IJRO AUKSION" ягона савдо майдончасида электрон ким ошди савдолари орқали амалга оширилади.

Ким ошди савдоси қатнашчиси йилига бир марта электрон онлайн аукцион орқали якка тартибдаги уй-жой қуриш учун битта ер участкасини сотиб олиш ҳуқуқига эга.

0,04 гектаргача бўлган ер участкалари қуйидаги шахсларга ким ошди савдосисиз берилади:
  • ҳалок бўлган ҳарбий хизматчиларнинг оилалари;
  • давлат ва хусусий уй-жой фондини эгаллаб турган турар жойларни ҳокимиятларга ўтказаётган фуқаролар ва мулкдорларга.

Имтиёзлар ҳар бир оилага бир марта берилади ва бошқа оила аъзоларига тааллуқли эмас.

Ким ошди савдоси ўтказилиши тўғрисида хабар ва лотлар тўғрисидаги маълумотлар ким ошди савдоси бошланишидан 30 кун олдин операторнинг веб-порталида жойлаштирилади.

Ўзбекистон Республикаси фуқаролари ким ошди савдосида қатнашиш ҳуқуқига эга.

Ким ошди савдосида қатнашиш учун аризаларни қабул қилиш операторнинг веб-порталида автоматик равишда хабарнома жойлаштирилган кундан бошланади ва аукцион кунидан 2 кун олдин (соат 13:00 да) тугайди.

Аризалар электрон кўринишда топширилади.

Ҳаётий мисол: ер олиш тартиби

Савол: Ж. исмли шахс якка тартибда уй-жой қуриш учун ер участкасини олиш масаласида қайси идорага, қандай тартибда мурожаат қилиши лозимлиги ҳақида ҳуқуқий тушунтириш беришни сўради.

Жавоб: Якка тартибда уй-жой қуриш учун ер участкалари мерос қилиб қолдириладиган умрбод эгалик қилиш ҳуқуқини реализация қилиш «E-IJRO AUKSION» ягона савдо майдончасида электрон аукционлар ўтказиш йўли билан амалга оширилади.

Бунинг учун эса, ҳокимлик ёки бошқа давлат идораларига мурожаат қилиш талаб қилинмайди ва электрон аукцион ўтказилиши ҳақидаги хабарнома «Электрон онлайн-аукционларни ташкил этиш маркази» давлат унитар корхонаси веб-порталига жойлаштирилганидан сўнг, ушбу электрон аукционда иштирок этишга электрон тарзда буюртманома бериш лозим.