Ўзбекистон қонунчилигига кўра, 18 ёшга тўлмаган ҳар бир шахс бола ҳисобланади. Боланинг ҳуқуқлари унинг ота-онаси никоҳда эканига, оиланинг моддий аҳволига, жинсига ёки бошқа ҳолатларга қараб фарқ қилмайди. Никоҳда ва никоҳсиз туғилган болалар тенг ҳуқуқларга ва бир хил ҳимояга эга.
Боланинг ҳуқуқлари фақат унинг ҳаёти ва соғлиғини асраш билан чекланмайди. Улар оилада яшаш ва тарбияланиш, таълим олиш, шахсий дахлсизлик, шаъни ва қадр-қиммати ҳурмат қилиниши, ўз фикрини билдириш ҳамда зўравонликдан ҳимояланиш ҳуқуқларини ҳам қамраб олади. Давлат болаларнинг камситилмаслигини ва ҳуқуқларидан фойдаланиши учун шароит яратилишини таъминлайди.
Болага оид қарор қандай қабул қилинади? Қарор унинг ҳаётига таъсир қилса, боланинг энг устун манфаатлари баҳоланиши керак. Бунда унинг хавфсизлиги, соғлиғи, оила ғамхўрлигида ўсиши, таълими ва ривожланиши ҳисобга олинади. Боланинг ўзи ҳам фикрини эркин билдиришга ҳақли. Ваколатли органлар унинг фикрини ёшидан қатъи назар кўриб чиқиши ва қарорни боланинг манфаатларидан келиб чиқиб қабул қилиши лозим.
Ота-она боланинг ҳуқуқларини ҳимоя қилади. Ота-она қарамоғи бўлмаса ёки улар болага нисбатан ўз мажбуриятларини бажармаса, қонунда белгиланган тартибда бошқа қонуний вакиллар ҳамда ваколатли органлар ҳимояни таъминлайди.
Муҳим: боланинг ҳуқуқи бузилса, у ҳимоя сўраб давлат органларига ўзи ҳам мурожаат қилиши мумкин. Мурожаатни фақат бола вояга етмагани сабабли кўриб чиқмасдан қолдириш мумкин эмас.
Ҳуқуқий асос: «Бола ҳуқуқларининг кафолатлари тўғрисида»ги қонун, 3, 7, 11 ва 15-моддалар.