Nogironligi bo‘lgan shaxslarning ta’lim olish huquqi
Nogironligi bo‘lgan shaxslar maktabgacha ta’limdan oliy ta’limgacha o‘qish, kasb egallash va malakasini oshirish huquqiga ega. Ta’lim olish shakli tanlanganda shaxsning ehtiyoji va unga zarur shart-sharoitlar hisobga olinishi kerak.
Maktab va kasbiy ta’lim
Nogironligi bo‘lgan bolalar umumiy ta’lim tashkilotlarida ta’lim olishi mumkin. Zarur bo‘lganda ixtisoslashtirilgan ta’lim muassasasida o‘qish tashkil etiladi. Qo‘shimcha ta’lim, jumladan san’at, sport va boshqa mashg‘ulotlarda ishtirok etish imkoniyatlari ham nazarda tutilgan.
Bola vaqtincha ta’lim muassasasiga qatnay olmasa, sohaviy shifokor tavsiyasi va ota-onasi yoki qonuniy vakilining roziligi asosida uyda o‘qitish tashkil etiladi. Uyda o‘qitish Davlat byudjeti mablag‘lari hisobidan amalga oshiriladi. Davolash yoki reabilitatsiya muassasasida yotgan nogironligi bo‘lgan bola uchun o‘quv mashg‘ulotlari shu muassasada tashkil etiladi.
Oliy ta’limga qo‘shimcha qabul kvotasi
Oliy ta’lim muassasalariga davlat granti asosida qabul qilinadigan abiturientlar umumiy soniga nisbatan nogironligi bo‘lgan shaxslar uchun qo‘shimcha 2 foizlik kvota ajratiladi. Ushbu kvota doirasida ishtirok etish huquqi tegishli ta’lim hujjatiga ega I va II guruh nogironligi bo‘lgan abiturientlarga, shuningdek nogironligi bo‘lgan bolalarga beriladi.
Kvota imtihonsiz qabul degani emas: qabul test yoki tegishli kasbiy va ijodiy imtihon natijasiga ko‘ra amalga oshiriladi. Qo‘shimcha kvota bo‘yicha qabul qilinmagan abiturient o‘zi to‘plagan ball bilan shu yo‘nalishdagi umumiy tanlovda ham ishtirok etadi.
Ariza topshirishda nimalarga e’tibor berish kerak?
Abiturient odatdagi qabul hujjatlariga qo‘shimcha ravishda nogironlikni tasdiqlovchi hujjatni taqdim etadi. Kirish imtihoni o‘tkaziladigan bino va auditoriyalarda zarur sharoitlar yaratilishi kerak. Agar harakatlanish, ko‘rish, eshitish yoki boshqa ehtiyoj bilan bog‘liq sharoit zarur bo‘lsa, bu haqda qabul jarayonida oldindan ma’lum qilish maqsadga muvofiq.
Huquqiy asos: «Nogironligi bo‘lgan shaxslarning huquqlari to‘g‘risida»gi Qonunning 38–41-moddalari; Vazirlar Mahkamasining 2018-yil 2 iyundagi 417-son qarori bilan tasdiqlangan nizom