Biometrik harakatlanish hujjati — O‘zbekiston Respublikasida doimiy yashovchi fuqaroligi bo‘lmagan shaxsning xorijda shaxsini tasdiqlovchi, harakatlanish hujjati egasining shaxsiy biografik ma’lumotlari va biometrik parametrlari kiritilgan elektron tashuvchi qurilma (chip)ga ega bo‘lgan hujjat.

► Harakatlanish hujjati olish uchun:

  • O‘zbekiston Respublikasi hududida doimiy yashovchi fuqaroligi bo‘lmagan shaxs harakatlanish hujjatini olish va almashtirish uchun o‘zi doimiy ro‘yxatda turadigan joydagi ichki ishlar organlariga murojaat qiladi.
  • Fuqaroligi bo‘lmagan shaxslarga harakatlanish hujjati 5 yil muddatga beriladi.
  • Bir yoshga to‘lmagan fuqaroligi bo‘lmagan shaxslarga harakatlanish hujjati 2 yil muddatga beriladi.
  • Harakatlanish hujjatining amal qilish muddati tugagach, shaxs uni ichki ishlar organlariga topshirishi shart.
  • O‘zbekiston Respublikasi hududida harakatlanish hujjati 10 ish kuni mobaynida, xorijda — 15 ish kuni mobaynida beriladi.

Taqdim etiladigan hujjatlar
  • belgilangan shakldagi ariza;
  • ilgari berilgan harakatlanish hujjati;
  • fuqaroligi bo‘lmagan shaxsning O‘zbekiston Respublikasida istiqomat qilishi uchun berilgan guvohnomasi;
  • tug‘ilganlik haqida guvohnoma (16 yoshga to‘lmagan shaxslar uchun);
  • ota-onalar, vasiylar (homiylar)ning fuqaroligi bo‘lmagan shaxsga (voyaga etmaganlar uchun) xorijga chiqishi uchun notarial tasdiqlangan roziligi;
  • fuqaroligi bo‘lmagan shaxsga (voyaga etmaganlar uchun) hamrohlik qiluvchi shaxsning notarial tasdiqlangan majburiyati;
  • 35 x 45 mm o‘lchamdagi 2 ta fotosurat;
  • davlat boji to‘langanligi haqida kvitantsiya.
  • 15 yoshdan 18 yoshgacha bo‘lgan fuqaroligi bo‘lmagan shaxslar ota-onalar, vasiylar (homiylar)ning voyaga etmagan shaxsning mustaqil ravishda xorijga chiqishiga notarial tasdiqlangan roziligi bo‘lgan taqdirda xorijga kuzatuvchisiz chiqishi mumkin.

16 yoshga to‘lmagan fuqaroligi bo‘lmagan shaxslarning harakatlanish hujjati ularning ota-onalariga, vasiylari (homiylari)ga, harakatlanish hujjati berish haqida ariza bilan murojaat qilgan tashkilotlarning vakillariga beriladi.

Harakatlanish hujjati
  • amal qilish muddati tugaganida;
  • harakatlanish hujjati blankasi yaroqsiz holga kelganida;
  • egasi biror-bir davlat fuqaroligini qabul qilganida;
  • uni rasmiylashtirish chog‘ida ataylab yolg‘on ma’lumotlar taqdim qilinganida o‘z kuchini yo‘qotadi.